Durangoko azoka
Liburu, disko eta bestelako produktuen azoka Landako Gunean kokatzen da.
Argitaletxeek, disketxeek, eragileek eta autoekoizleek azokan parte hartzeko aukera dute. Erakusmahaiak alokatzeko bete beharreko araudia kontsultagai dago.
Durangoko Euskal Liburu eta Disko Azoka
Durangoko lehenengo Euskal Liburu eta Disko Azoka 1965ean egin zen, Andra Mariko elizpean. Abenduan ez ezik, azaroaren 1ean ere bai, Domu Santu egunez. Sortu berri zen Gerediaga Elkarteak antolatu zituen ekitaldien artean lehenengoetarikoa izan zen. Frankismoaren diktadurapean azoka hark helburu nagusi eta argia zuen: Euskal Herriko liburugintza eta diskogintzaren ekoizpena ezagutzera ematea.
Elizpean baserritarren merkatua izaten zen larunbat goizetan, eta lehenengo urte hartan ere goizez ohiko merkatua egin zen. Arratsalderako, bizpahiru orduko lanen ondoren, prest zegoen liburuen eta diskoen azoka. 19 erakusle eduki zituen lehen edizioak.
Merkatu plazako garaia
1974. urtera arte Andra Mariko elizpean egin zen urtez urte azoka. Baina, tarte hartan urtebeteko etena egon zen: 1967an ez zen azokarik egin, Andra Mariko elizan konpontze-lanak egin zirelako eta baldintza horietan ezin zitekeelako ezer antolatu.
Azokak hartutako oihartzuna ez zen izan sasoiko gobernadore zibilaren gustokoa. Aitzakia bezala erlijio arrazoiak ipinita, Andra Mariko elizpean egitea galarazi zuen. Debeku horren ondorioz, liburu eta diskoen azoka merkatu plazara eramatea izan zen irtenbidea.
IX. Durangoko Euskal Liburu eta Disko Azoka merkatu plazan egin zen. Eta modu horretan merkatu plazan egin zituen urterik gehienak, 1974tik 1995era arte.
Landako Guneko epeltasunera
Euskal Liburu eta Disko Azoka indartzen joan zen denborarekin: partaideak ugaritzen joan ziren, bisitari kopurua handitzen urterik urte... Merkatu plazaren lau hormak txiki geratu ziren eta espazio finko baten faltan, 1996tik 2002ra Durango herriko orube askotan karpak instalatu behar izan zituen antolakuntzak. Euskal kultura gozatzera eta babestera zetozen bisitariei lekua egitea izan zen helburua. Lekurik leku ibilitako garai horretan, tartean, Landako eremuko lurzoruan ere egokitu zen karpa.
2003an Landako Gunearen epeltasunera igaro zen azoka. Horrela, leku handiagoa, azpiegitura egokiagoa eta espazio erosoagoa lortu zuen ekimenak, baita aurrera begirako aterpe bat ere.
Guneekin, azoka zabaltzen
Urte batzuk lehenagotik, azoka baino izaera zabalagoa hartzen hasi zen jaialdia, Haur Literatur Aretoa (gaur egungo Saguganbara) martxan jarri zenean. Baina, 2008an pauso esanguratsu bat eman zen bide horretan, sortzaileen eskutik Ahotsenea egitasmoa jaio zenean.
Lehen edizioan Elkartegiaren atzekaldean egin zituzten aurkezpenak, abenduaren 6ko egunez. Xabier Amuriza, Kirmen Uribe, Rafa Rueda eta Keu aritu ziren, besteak beste. Gainera, bost egun lehenago hil berria zen Mikel laboari omenaldia ere egin zioten.
Hortik aurrera, gunez gune handitzen eta zabaltzen joan zen ekimena, Durangoko Azoka bihurtuz. Gaur egun zortzi gune ditu: Ahotsenea, Atartea, Berbagailua, Irudienea, Kabia, Saguganbara, Szenatokia eta Talaia.
Sormen Beka
Durangoko Azokak etorkizunera begira ipini, eta Sormen Beka antolatu zuen lehen aldiz, sortzaile berrien lana hauspotzeko asmoz. Etzi Portu Maritimoa taldeak eskuratu zuen bekaren laguntza, Atopia RPG rol jokoarekin.
Beka honen helburua euskarazko sorkuntza sustatzea eta sortzaile berrien lana ezagutzera ematea da. Gerediaga Elkarteak eta Durangoko Udalak euskarazko lanen zabalkundea egin eta sortzaile berriei bidea erraztu nahi diete, Durangoko Azokaren bueltan.
Kultur sorkuntzaren barruan Durangoko Azokak bere baitan hartzen dituen diziplinak izaten ditu kontuan Sormen Bekak, eta urtez urte diziplinaz aldatzen joaten da.
Gerediaga Elkartea
1965. urtean sortu zenetik Durangaldearen alde lan egiten duen elkartea da. Durangoko Azokaren antolatzaile nagusia da, eta antolaketa taldera batutako beste elkarte, erakunde eta taldeen koordinatzailea ere bai.
Izan eta eragin lemari jarraituta, Durangaldeko kultura, historia eta ondarea zabaltzeko lan egin gura du, gizarteari eta euskal kulturari ekarpena egiteko.
Eskualdeaz arduratzeaz gainera, euskal kulturgintzak leku garrantzitsua izan du elkartearen ibilbidean. Era horretan, gaur egun Euskal Herriko kultur ekintza garrantzitsuenetakoa bihurtu den Durangoko Azoka antolatzeari ekin zion sorreratik.
Babesleak
